Le Poesie di Paolo Ruggirello

A cannila d’ògghiu ‘bbònu,

quannu ancora un c’èra luci,

tammureddu e crivu novu

pi lu pani chiantu e vuci;

spiriamu chi nun torna

scungiurannu fazzu corna.

Di ‘ddi tempi li scarsizzi

cummigghiavanu anchi l’occhi,

carricati di stanchizi

e anniati di pirocchi;

fiddu fami e pedi scausi

chi ni ficiru li nausi,

Pi vuscari la jurnata

avia di torciti lu schinu

a cammisa trapanata

pi vuliri d’ù distinu;

e la vuci di Dòn Vitu

ti tiniva rimbambitu.

Travagghiavi tutu l’annu

supra landi lu patruni,

ti piscava lu malannu

tu purtavi pi cutruni;

era n’ébbica curnuta

eri tu a carni vinnuta.

Quannu c’éra la cannila

pani a pisu di valenza

un paru i causi di tila

e la guerra ni la panza;

c’ùna seggia e tri cavigghi

e n’à massaria di figghi.

Oa u pani unn’è un problema

ti lu trovi dunn’é ‘gghé,

si canusci l sistema

poi cantari olì, olé;

un fai cunti dù travagghiu

né suura n’ò fruntagghiu.

Ora c’é a tilivisiuni,

u vistitu e le cappotto,

tanti arii chi i duni

e ti senti chiù picciottu;

manci, sciali, fai u cafuni

e li vavi a pinnuliuni.

Una vota a pani schittu,

ora l’ebbica è diversa

‘un pusseri chiù pitittu

e fai puru u mangia persa;

si d’a vita tanti sazziu

e dici, Cristu ti ringraziu.

Scumpareru li cannili

lampadari n’ogni stanza

si va ‘ncerca di lu stili

piaci a tutti l’eleganza;

basta aviri u Decimila

p’annagghiari la cannila.

‘Un facemu li baggiani

abbuzzamu a li sirvizza,

sù travagghiu torna pani

u ghittamulu a munnizza;

picchi ogni malichianza

su duluri pi la panza.