Curri luntanu a menti dù pueta

ni lu desertu e dintra lu jardinu,

riogghi li pinzeri fa u prufeta,

e accusa ‘stu duluri ripintinu.

I versi si li fa comu pi ghiocu,

‘ncontra ‘stu fumu cùn ci duna abbentu,

macina cù pinzeri petri e focu,

sturia e ‘nni crisci l’argumentu.

Penza, scrivi, si traccia la via,

fa di l’aceddi l’armuniusu cantu,

pi chista tera trova simpatia,

di russu e virdi si crisci lu mantu.

Percia lu celu e nnì trova l’artizza

tra i nuvuli tirati di lu ventu,

varda luntanu l’occhi ci l’appizza

scopi li guai e rima lu lamentu.

‘mmenzu li negghi ricoggi paroli,

scava lu munnu cu la fantasia,

li coci comu fussiru stigghioli,

i cusi tutti e ‘nni fa puisia.

Penza di dimizzari l’amarizza

crisci li vogghi di lu so caminu

chinu d’amuri e di tanta saggizza

lassa u munnu ‘mmànu a lu distinu.

Recita e canta l’innu di la rima,

varda lu suli e leggi ni la sfera;

nudda cosa mai perdi di mia

fa di lu versu granni primavera.

Sfogghia lu libbru di la fantasia

trasi ‘nni l’abissi di lu mari,

fa la ricota, crisci di mastria,

penza la rima e si mitti a cantari.