Amu manciatu ni lu stessu piattu

n’àmu abbrazzatu gioi e affanni

amu tinutu strittu lu cuntattu

senza fari mai u spenni e spanni.

Dù cori pi la vita ‘ncumpagnia

ni cunfissamu senza cunfissuri

una bannera russa sbinnulia

crisciuta cu l’asta di l’amuri.

Amu purtatu avanti ‘na famigghia

stanchi, affannati, comu d pizzenti

‘na taula, dù seggi e ‘na cavigghia

amu tiratu sulu cu li renti.

Comu li chiova ‘ntesta li capiddi

n’àmu tinutu u munnu cu li spaddi

dintra di l’occhi coscinu faiddi

supra lu schinu facimu li caddi.

Amu campatu ‘mmenzu a tanta amici

stimati e apprizzati di la genti

l’umanitati ni fa di curnici

privi di sordi ma tantu cuntenti.

Tutta la vita cu li peri ‘nfunnu

campari di stentu u nostru forti

i nostri manu scavanu ‘stu munnu

chini d’amuri pi la bòna sorti.