Dissi o patruni a seggia ‘na jurnata

un ti pirmittu i farimi sti scherzi

mi teni ‘ndi ‘na gnuni abbannunata

ora chi sugnu vecchia mi disprezzi

Tutta la vita t’àiu suppurtatu

intra la casa iu facia la sfera

supra di mia tu beddu assittatu

comu un miscottu supra la ‘nguantera

Ora m’arriducisti scattiddrata

mi ‘ntratteni fora di lu iocu

o fucularu fui racumannata

mi sistimasti pronta pi lu focu

Ridutta senza funnu né cavighi

m’arrusicasti pi finu li caddi

m’arrunzi cu li peri e ‘nti catigghi

si dignu di pigghialli ni li spaddi

Nascivi ed ‘àiu sirvutu chistu munnu

e penzu chi ‘nn’aiu fattu puru assai

tu chi criscisti sulu macabbunnu

chiangi p’aviri cumminatu vai

Sugnu cuntenta d’aviri sirvutu

tegnu a cuscenza appostu, tu lu sai,

tu patruni vai circannu aiutu

picchi? p’à vita unn’ai sirvutu mai