Staiu virenn’u’ suli tramuntari

viu a punenti, focu sbambatu

e FAVIGNANA l’à viu annacari

e iu n’àlluccutu : ‘nnamuratu.

Celu e mari : smània di russura

e’ l’isuli, comu fantasmi culurati

MARSALA di stu lustru si culura

trovi palazz’è strati, arraccamati.

Vestisi di russu,quali maravighia

c’u fici ‘u munnu pursiria mastria

stu quatru, prisinta nna cunghiglia

avemu di : ringraziari l’u’ MISSIA.

Quanta biddizza scava l’u’ pinzeri

criritimi ‘nnò spissu mi cunfunnu

chi fazzu stenti : a tenimi ‘mperi

Sugnu pueta, né quatru, né tunnu.

Taliannu : penzu e scrivu puisia

addinucchiuni ringrazi’u CRIATU

nu ‘mbastanu, i paroli à fantasia

ci voli : un ciriveddu cunzacratu.

Grazzi à musa, iu sugnu filici

puru si spissu mancu di misura

ò munnu, sentu faricci à curnici

e dicu:quant’e’ granni l’à natura.