Cantu u ricordu di mè figghiu

dintra lu cori mi ristau cusutu

ancora quanta collira mi pigghiu

nuddu Santu chi ci detti aiutu.

Ci l’occhi mei vidi sulu stiddi

mai mi lu scordu pù minutu

mi toccu ‘ntesta tisi li capiddi

abbiliatu u sangu mu tramutu.

Quantu lacrimi amari pi stu figghiu

m’éru ridduttu cu l’ossa e la peddi

cu stu pinzeri tantu m’assurtigghiu

quasi u mi reggiu supra sti canneddi.

Biatu cu sta pena si la scanza

u ciriveddu mi juntu cottu

di ‘stu figghiu sentu la mancanza

astura fussi un giuvini picciottu.

Sunnu passati jorna, misi ed’anni

scava la menti ‘funnu li pinzeri

riduttu vechiu e chinu di malanni

sugnu arrivatu c’ùn mi reggiu ‘mperi.

Chi mala sorti pi ‘stu figghiu miu

d’ìddu lu destinu si ‘ngiammau

avillu granni era tantu priu

a morti vili u vosi e su pigghiau.