Mi susu prima chi lu suli spunta

livanti s’arisbigghia ‘nnamuratu

u calannariu n’autru jornu cunta

ed’iu mi fazzu duci lu palatu

i raggi di lu suli mi trapunta

e mi mantegnu forti e ‘nnamuratu

cù secuta a campari poi raccunta

tuttu fistusu si crisci lu ciatu.

U suli sapi darinni la vita

ognunu si pò crisciri li vogghi

supra la terra porta a campavita

li gruppa malifici l’astrogghi

senza chi lu simini l’arricogghi

profuma l’aria ‘na cosa squisita

e tu di tantu beni ti cummogghi.

U suli sapi vestini di gioia

‘ncelu l’aceddi cantanu l’amuri

ti sapi alluntanari di la noia

u camp crisci e ni duna li ciuri

u viddanu all’arbulu s’appoia

trova la terra china di splinnuri

luntanu di lu empu tantu boia

trovi lu munnu beddu di culuri.

Senza ‘stu suli un fussimi nuddu

‘stu beni u munnu unnì l’avissi

nui, tanti armaluzzi senza puddu

un c’è bisognu i mettiri scummissi

‘nzoccu fussimu ‘un lu sapissi nuddu

fangu o puru petri ni l’abissi

mentri scrivu l’occhi mi l’abbuddu

sulu di negghi u munnu si vistissi.

Grazzi o suli semu filici

simini, arricogghi e poi campari

di la natura nui li megghiu amici

supra la terra rinesci a cuntari

picchì lu suli a tutti binirici

cu l’occhi poi lu munnu scunfinari

ed’òra chi sappi fariti a curnici

ti preu, suli beddu ù’mmì lassari.